Год назад, 6 жніўня 2022 года, у Лондане з’явілася выдавецтва «Скарына». На сваім сайце ініцыятыва падзялілася прамежкавымі вынікамі працы.
Выдавецтва заснаваў беларускі бібліятэкар Ігар Іваноў, што стала жыве і працуе ў сталіцы Вялікабрытаніі.
Першай кнігай «Скарыны» стаў паэтычны зборнік Ганны Комар «Мы вернемся». Гэта кніга дакументальнай паэзіі, кніга галасоў тых, хто з’ехаў з Беларусі пасля падзей 2020-га. За ёй выйшаў пераклад украінскага пісьменніка беларускага паходжання Агатангела Крымскага «Бэйруцкія апавяданьні».
Наступная прэзентацыя адбывалася ў Лондане ў лістападзе 2022 года. Да таго часу «Скарына» выдаў кнігу прозы Уладзіслава Гарбацкага «Mercks Graz!», якая складаецца з аднайменнай рамантычнай аповесці і падарожных нататак з аўстрыйскага Граца. «Найпрыгажэнная віцебская гаворка і нечаканыя паралелі з Віцебскам ствараюць шматслойны эфект: гістарычная аповесць пра Грац ХVII стагоддзя, насельніцтва якога было сцёртае паляндрай (багіняй смерці. — Заўв. рэд.), успрымаецца праз прызму беларускіх гаворак, амаль сцёртых расійскай каланіяльнай палітыкай», — піша выдавецтва.
Наступнай навінкай стала невялікая кніга «Belarus Knockin' at the Vaticanʼs Door» на англійскай мове, расказвае пра беларускіх палітвязняў-хрысціян і аналізуе палітыку Ватыкана адносна беларускіх пратэстаў 2020 года.
Вясной 2023 года выйшлі тры зборнікі паэзіі — багаслоўская «Літургія часу» Алеся Дуброўскага, «Corpus Vile» Артура Камароўскага і дэбютны зборнік «Выпадак» Дзмітрыя Рубіна.
У ліпені быў надрукаваны паэтычны зборнік-фотаальбом «Bloodlands 20/22 Belarus/Ukraine», падрыхтаваны паэтам Алесем Плоткам і фатографамі Алесем Пілецкім і Станіславам Крупажам па слядах беларускіх пратэстаў і вайны ва Украіне.
Кнігі можна набыць афлайн, даступныя і замовы электронных версій.